我的口述史――從打機說起

序

這是一份功課。本來我想寫書桌的口述史，但想着想着書桌，想着想着過去。我想起自己打機的事更多，愈想愈多，而且愈想愈懷念。我怕自己不記下來，就會忘記，或者不再想起，所以藉着功課迫自己寫下來。這樣一來，每年總有好幾天會重讀網誌的自己，就會讀到，就會記起來，好好重新懷念一遍。反正這份功課好像有交就能合格。我就把這當成一個自我紀錄，當成關於自己的歷史。

我的口述史――從打機說起

自從被歸類為一個御宅族，同ACGN扯上關係，我一直覺得自己係G方面涉獵最少，但諗返起細個果時，好似打機先係最多，係最大嘅娛樂。

細個，仲係細路果陣，我記得我有玩過PS1同GameBoy。邊個先邊個後我就唔記得啦。

GameBoy

咁講GameBoy先。我記得玩嘅遊戲都係彩色嘅。有玩過日本戰隊、蜘蛛俠、狼人、寵物小精靈，其他唔知係唔記得定無勒。啲Game玩咩都唔得。反而淨係記得寵物小精靈，當然有部份原因係不斷翻炒，其餘係記得細個果陣唔知佢玩咩，一來係言語不通，二來根本唔想睇字，三來行來行去唔係好知要做咩，唔知要行去邊先過關同有怪打。之後電視有播寵物小精靈卡通，我都唔係好鍾意，就無特別去玩返。

有一件事，有GameBoy係其中，唔知點解幾深刻。件事發生係醫院嘅。果陣去醫院探病，去到醫院悶，或者親戚驚我悶，我就攞咗部GameBoy黎玩。應該醫院有規矩唔比打機掛，探病嘅親戚就叫我「哩埋」去窗邊用窗簾掩護住咁打機。但都係比護士發現咗，親戚就同護士解釋細路仔係醫院悶，比佢打下機啦，之後就無嘢啦。

部GameBoy之何去何從呢？我記得部機係大個啲之後比咗大我幾歲係珠海嘅表哥。

我記得部機係白色半透明嘅。然後可能係比漏咗表哥，我係屋企仲搵到嘅隻廿二合一嘅GameBoy帶。

我部GameBoy嘅示意圖（來源）

喺屋企仲搵到嘅隻廿二合一嘅GameBoy帶

PlayStation1

跟住就講PS1。我好記得我係喺珠海玩嘅。一開始我記錯以為部機係我地嘅，我都隱約覺得怪怪地，因為我記得幼稚園第二年就喺珠海落咗黎香港。幼稚園邊好似而家啲細路識打機㗎。後來講返起，阿媽先話返我知，原來部PS1係住係姨丈嘅。大概係我小學果時放假時常返珠海果時玩嘅。

PS1嘅示意圖（來源）

記得嘅PS1 game唔算好多。

吞食天下（上網找資料才知道自己玩的是2，完全記不起來啊。另外，後來我發現我記錯/一直都叫錯名，不過呢個錯嘅稱呼係呢篇文就唔改啦。係吞食天地啊。）係最記得嘅，原因係阿爸成日講起。佢成日講起係因為嘅係得佢打得爆嘅game，我打唔爆。我同表哥一齊二人合作都過唔到。我兩個表哥合作都過唔到。阿爸同表合作都過唔到。我同阿爸合作都過唔到。近乎試齊所有組合都係過唔到。明顯同我講緊，兩個人係過唔到嘅。但係我係唔信嘅，所以比我講下以下嘅藉口。

一，因為兩個人打都係分享相同嘅生命總數。即係命就得咁多條，邊個死都一樣。

二，你話兩個人有兩個兩戰力喎。係，但係一關嘅補血道具係得果幾個咁大把，補得一個補唔到第二個。另外，無血個個唔可以算戰力，因為保住唔死都好麻煩。過咗關就可以補滿血，而且用一個重生又好似好嘥。一個唔好彩，你重生無耐打咗兩嘢就過關就慘啦。

三，個遊戲設計係，卡係同一個位打完先有得繼續行，但係喺果個位個畫面又包唔晒，可以移左移右。兩個人打，兩個角色係同一畫面，一個行左，一個行右，個畫面就會追住其中一個，第二友就會睇唔到自己個角色，比人「暗角打鑊」，死咗都唔知咩事。

四，係人嘅問題。畢竟我同表哥都仲係小學生，打機無咁叻都係正常嘅。

我覺得第四項先係重點。哈哈哈。不過點都好啦，到而家機又唔知去咗邊，隻碟亦都唔知飛咗去邊。

好喇，講返個遊戲。我記得阿爸係用關羽爆機嘅，用其他角色係唔得㗎。仲記得阿爸講到最後大佬呂布之前要留返唔知幾多條命去返生，先打得死呂布。而呂布有三條血，又勁。

阿爸爆咗肯定唔止一次機，因為我好記得，打死呂布之後，會見曹操。見曹操有得擇放咗佢或者殺咗佢。有一次，阿爸打到有得擇之後，就比咗個手掣我，比我擇，然後爆機。咁樣我就可以一嘗爆機嘅滋味。

吞食天下有幾個特別嘅地方。首先，真·三國無雙肯定有參考佢，因為啲補血道具，饅頭啊，雞脾啊，全隻燒雞啊，係一樣嘅。呢點我都係而家諗返起先發現。其次，吞食天下出絕招係扣血嘅，雖然所謂嘅絕招只係打飛周圍嘅敵人，但扣血嘅點真係得佢有。而家諗返起，呢樣嘢有少少哲學味道。我仲記得以前因為出絕招會扣血，所以試過無咩血嘅時候瘋狂出絕招會點。結果會點？唔記得。不過以前我都幾有實驗精神。第三點，呢隻遊戲係我第一次接觸三國。

講返而家，除咗網上有啲假嘅Flash版吞食天下之外，無記錯嘅話銅鑼灣世貿間機鋪，係有部吞食天下嘅機。我記得一條命都幾貴下。上網找資料的時候發現PSV上有得係網上商店買呢隻吞食天下。

吞食天下就講到呢到。

PS1有深刻記憶都仲有幾隻：越南大戰、風之谷、百事超人、蒙面超人亞極陀、射鵰英雄傳。下面逐隻講。

越南大戰（MetalSlug官方網站），無咩特別好講，三隻字講晒，好好玩。

越南大戰有得無限命。呢個好重要，唔係嘅話爆唔到機，睇唔到佢出字幕。哈哈。

一個好長嘅系列，出咗好似有六集。一直有唔同嘅敵人、武器、關卡，甚至模式，好好玩，亦都可以長玩。我一直由PS1玩到PS2，再玩到PSP（PSP好似得合集，一次過齊返晒都夠正）。咁多代以來唔知點解我好鍾意用Marco，雖然個個角色都係一樣咁打。

最記得有一代（應該係喺PS2嘅）爆完機之後，可以用一開始嘅敵人啲兵仔打外星人（好似後第3代）。我好鍾意嘅個模式，呢個模式無記錯係得一條命，無得返生。我係未爆過呢個模式。同埋我覺得真係好得意，有得用對面啲兵仔。但係始終我都爆唔到，亦都玩過唔多次。因為要先爆咗機先開到呢個模式，爆機要用好多時間，而且打到爆機已經有啲攰，加上等個字幕上晒係一件好麻煩嘅事，又長又無得飛。以前打機，阿媽會限時間，其實爆到越南大戰一定係超咗時，阿爸見到升字幕都會叫我熄機。

好喇，我都估到大家會問，save低下次打咪得囉。越南大戰唔知佢係設定好定點，係無得save㗎。另外，講起save，其實PS1係咩無得save㗎，因為我無咩像有save過，所有遊戲都係從頭打咁。

講返而家，越南大戰無出新作，但越南大戰在steam 上1、2、3同X可以買，但只有3同X可以上網連機。另外，原來係PlayStationStore上都可以買到越南大戰。

我屋企有嘅越南大戰碟

風之谷，後來上網才知道正式名字叫風之少年，不過由細到大都咁叫，未來亦都無咩機會再提到呢隻遊戲，所以就唔再改變呢個錯嘅稱呼。

點解會買呢隻遊戲呢，其實內裏有個故。對我黎講呢個都係一個故事，因為我對呢件事近乎無記憶，我都係聽阿爸講返。細細個一家人去遊輪旅行。遊輪上有一間遊戲房。遊戲房有機打，其中一隻遊戲就係風之谷。我好鍾意玩，返黎之後就買咗隻碟。

和在遊輪上的經歷一樣，我對風之谷的細節都係無咩記憶。你可能覺得奇怪，無咩記憶，何來深刻？其實準確啲黎講，我深刻記得嘅係PS2風之谷2。

對風之谷1記得嘅係主角係一隻戴住鴨嘴帽、同數碼暴龍03隻大耳獸一樣嘅耳仔嘅獸人。武器係一個可以吸住敵人嘅手環，被吸住嘅敵人會變成成個波咁，話就話係手環但成但頸環咁大。手環嘅頂端有一藍寶石，寶石裏面寄宿住一隻精靈，大概係手環嘅力量來源。

對第一代嘅記憶係一開始係個有間風車嘅房到開始。可能同我之前講過嘅PS1無得save有關。其實到大個啲有PS2，我有留返風之谷1隻碟，亦都記得曾經玩返。始終記憶都係停係風車到，因為PS2係唔可以save PS1嘅遊戲。

風之谷1果個大耳少年永遠比我停留喺佢屋企個大風車下。

反而到咗可以save嘅PS2玩風之谷2，我爆咗兩三次機。我變返喺遊輪上果個好鍾意風之谷嘅細路。可能係個遊戲方式好正，吸住敵人可以向下掟兩段跳，亦都可以掟向敵人攻擊或開機關，又有得打大佬。我好記得有一關有得滑水。成隻遊戲好有趣。有少少美中不足係睇唔明個故事，因為係日本。

另外，在上網搵風之谷個真名嘅時候，搵到呢位朋友對呢住遊戲嘅描述。佢同我一樣都將風之谷叫風之谷，加上佢下面留言話搵到隻遊戲其實叫風之少年。我都係藉住呢網搵到個真名。係到引呢位朋友對風之谷嘅描述：

「在記憶中這款遊戲的名子叫做風之谷

但這只是朋友跟我講的

所以我也不是很清楚這款遊戲的名子

線索:

是橫向闖關冒險遊戲

主角好像是一隻可愛版的狼（像人一樣站立）

遊戲中的怪物都是滿可愛的，主角手上好像

有一個類似戒指的東西，按一下就會有白色的

圓圈，碰到怪物就會被你抓住，攻擊方式就是

把小怪抓起來，丟出去，打王也是，把小怪抓

起來丟王，關卡非常多，而且都很有趣，血量

方面好像是三顆愛心，被碰到一次就少一顆還少

半顆，我卡在有一關的王好像是一隻非常大的怪

物，要先採地上的類似鋼琴鍵盤，連續踩完後才

可以抓小怪丟王，不知道有人知道這款遊戲叫?」

我屋企嘅風之谷碟

風之谷1

風之谷2（隻碟唔見咗，得返個「皮」……）

百事超人，一個操控住一個銀藍色人喺限時內跑到終點嘅遊戲。

遊戲深刻嘅嘢有幾點：經常出現的「be sa」、周不時係背景響起有獨特節奏嘅「pepsiman」、百事超人喺每關嘅小關後都會去汽水機買罐百事黎飲。雖然百事超人無樣，同埋佢嘅肢體動作，可以感受到佢嘅爽快。當然呢種爽快係包括埋我過到關嘅感受。

基本上百事超人嘅動作有加速、跳同剷，要避過各式各樣嘅陷阱去到終點。

我記得我係無爆過機嘅，同之前嘅原因差無幾，都係被阿媽限時間，二來根本無得save。我睇返game play（文未附連結），我應該玩到去第三關第一節。

我最記得係第二關第二節，地下鐵有一度有個鐵剷係地下，我次次都會踩中。

講百事超人，我要講多樣，我無比呢隻遊戲吸引到鍾意百事，我始終都係鍾意可口可樂多過百事。哈哈。

蒙面超人亞極陀，買呢隻遊戲極有可以因為當時（已成歷史嘅）亞視有播。呢隻係一隻格鬥遊戲。

故事模式係操控超人打怪物。故事模式可以打三次，因為亞極陀有三個蒙面超人。最煩係第一次用亞極陀過故事模式，因為過左之後會出字幕，重點係無得飛。打完亞極陀嘅故事模式之後，開到（G3同。。。）的事故事模式，再之後就到嘅。其餘果兩次過到故事模式個字幕係可以飛概，真係可喜可賀。

對我黎講成隻遊戲最重要、最好玩並唔係故事模式，而係爆左三次故事模式之後嘅挑戰模式。挑戰模式可以雙人合作，至於可唔可以單人就唔記得。喺挑戰模式裏面係唔可以特別嘅招數，只可以用普通嘅拳打腳踢，除非添到個心心。個心心一開始喺敵人到，只要重擊到就會飛到出黎。我好鍾意呢個挑戰模式。到左大個啲，到PS2都仲有挑返，仲要同細佬一齊合作，打到多過五十層。

我屋企嘅蒙面超人亞極陀碟

射鵰英雄傳，係RPG。

當時我係未睇過射鵰，其實係一本金庸都無睇過。我到考完DSE先睇射鵰，同時亦都係睇過嘅唯一一本，其實唔係唔好睇只係因為懶。

講返隻遊戲，最深刻嘅地方係其中一幕，主角郭靖同佢個好安搭（兄弟）去打有刀嘅金兵，點知郭靖一刀被個金兵斬死咗。咁好啦，諗住用郭靖個好安搭打贏返，郭靖就有得救，點知佢個好安搭走咗，然後戰鬥失敗，之後黑咗畫面。

好震撼，當時完全唔知發生咩事，一路都正正常常，突然主角就比人殺咗。

之後，唔記得發生咩事，大概係熄咗機。

嘩，呢件事阿爸之後一同我講起射鵰英雄傳呢隻遊戲，都一定講起呢件事，郭靖比人一刀斬死咗，個好安搭走咗佬。

我記得我之後唔信係咁，又再玩多次，結果點行都係得一條路，一定要去個有刀嘅金兵度。我又見證郭靖比人一刀斬死咗，個好安搭走咗佬。

但係我唔信就咁完，就等咗陣。卒之比我等到，黑畫面之後，原來郭靖比高人救咗仲，仲學識咗越女劍法添。咁樣就有得走落去啦。

我記得因為郭靖比人用刀斬死咗呢下實在太震撼，心有餘悸，即使之後見到金兵揸兵，我都會㩒掣逃跑。唔驚再比人一刀斬死咩，痴線。

後來，我都係走咗去挑有刀嘅金兵，一來為咗經驗值，二來想試下係咪真係對方有刀就一下死（因為有好多敵人都有刀，下下走佬、避戰唔係辦法）。點知一試，先發現之後揸刀果啲斬你只係扣多啲血，無話好似第一次咁一刀比人劈死咗咁陰功。

阿爸之後再同我講起射鵰英雄傳「郭靖比人一刀斬死咗，個好安搭走咗佬」呢件事，我都會加多句郭靖之後比人救，仲學埋越女劍法。

其實阿爸第二次都有睇住我玩，即係見住我無死。第一次甚至應該係佢自己玩嘅。隻碟都係應該因為佢有睇過晒所以金庸，先買黎玩。不過佢唔記得郭靖第一次比人斬跟手比人救返果下弊。

同樣地，因為我細個果陳唔可以打咁遲，又無得save，所以無行到好遠。

大個之後都有攞隻碟返去PS2玩，但一來無得save，二來我唔係好鍾意回合制遊戲，我玩多咗一次，行遠多啲，入到山洞打梅超鳳，就無打落去。

（下附射鵰英雄傳遊戲流程。）

我屋企嘅射鵰英雄傳碟

街機

我記得喺珠海嘅時候，成日去拱北，有個叫迎賓廣場嘅商場，上面間機鋪。

間機鋪係點嘅，有啲咩遊戲，我唔記得啦。我得得係一排一排機咁樣。

我最記得嘅遊戲係西遊記，全各當然不記得。可用嘅角色，當然有三個徒弟：孫悟空、豬八戒同沙僧，至於仲有無其他角色，我唔記得。

我對成件事都好模糊，有咩敵人啊，有咩招啊，一概唔記得。淨得記得一排機，至少有兩部可以連機，因為我記得我同表哥一齊打嘅。表哥係第二個屏幕指導我嘅（佢個角色死咗）。

呢一幕我記得最深刻，好似刻係腦裏面咁。我當時用緊孫悟空，表哥係旁邊旁機睇住我打，叫我執返把武器，即係金剛棒。係咁多。

即使上網搵資料，搵到個最似嘅（最似果隻叫西游釋厄傳），我都唔係好肯定。同上面提過嘅遊戲，我睇返畫面我就記得返。係呢西遊記街機，我始終唔係好清楚。可能係因為仲細個。

就在幾個星期前，五月頭，我返左珠海，去左拱北廣場。我發現間機鋪已經唔見咗，消失咗。

上左大學之後，我唔知點解見到機鋪就入，可能係想搵細個入機鋪打機果種感覺。我發現，其實無咩遊戲啱我玩。所有機鋪一定有嘅捉魚機、街霸、高達，我都唔啱。新啲嘅有灣岸、唔同嘅音樂遊戲，我都唔嘅。我見到有稍為興趣嘅，反而係射飛機、攞模擬槍射嘅槍game、吞食天下、魂斗羅等。我最想玩返嘅都係捲軸遊戲。

我始終搵唔番細個入機鋪果種感覺。

講起魂斗羅，我記得德福間機鋪，有一台機有得打魂斗羅，只係係寫文嘅而家，收到消息德福間機鋪做到五月三十一號就執啦。

結語

我本來無打算停係到，因為一開始室驚無神諗返起舊時間打機啲嘢，其實係諗起PS2先，之後到電腦，再伸延落去。諗起視覺文化份功課，再連結到上堂有教口述史，就順便逼自己將呢啲回憶記落黎。咁做得口述史，自己又仲記得個時序嘅話，都順得時序就順。結果，因為字數限制，又有其他功課、考試果啲林嬸嘢，要停係到。本來我打算用PS2同電腦做主打，畢竟回憶最多。而家咪當打save point，停一停先，不過我好懷疑忙完之後會唔會再打落去，因為無咗功課作為推動力。~~又或者，根本有無忙完嘅一日。~~希望自己會寫落去，寫PS2、寫電腦、寫掌機，畢竟呢啲全部都係我好重要嘅回憶，我好想係佢地逐漸流走之前記留晒佢地。

註：

（我無註來源果啲圖都係自己係屋企影嘅）

係啊，你睇啲圖都知我啲碟近乎全部都係翻版。關於呢點我希望下篇講多啲。

算啦，不如而家講。講真，如果唔係翻版碟，我嘅打機日子無咁開心同精彩。

補多句，大家支持正版啊，我而家都盡量玩返正版。

補充資料：

喺補充資料呢堆連結，大多都係其他人嘅遊玩情況，但係我要講一點。其實我特意搵啲，會比人到，甚打死嘅遊玩影片，因為網上絕大部份都係咩無傷攻略，但係會輸、會死，先至係真正愉快嘅打機。呢個大概係打左咁多年機嘅小小心得。