★非作商業用途，本檔案版權歸版權持有人獨有★
又嚟到惡作笑評，我係TD TSUN（叔）。我哋今集非常之特別，係會同大家以一個搞笑嘅角度去睇下哈利波特電影。
我哋會集中同大家拆解一下，呢個被喻為世界上最優秀、最安全嘅霍格華茲魔法學園，點解會係世界上最危險、最惡劣嘅垃圾學校。
睇完之後，你係可以完全見識到佢嘅教育政策係有幾咁罔顧學生嘅生命安危。
但請大家唔好誤會，我係鍾意呢套電影㗎，呢七部曲我係由細睇到大，可以話係陪伴住我一齊成長，佢有成八套電影咁多都可以唔爛尾，真係好成功。
對比起其他續集電影，佢真係好有優秀㗎啦。（畫面展示他之前做的惡作笑評系列吐槽）
如果你未睇過哈利波特嘅話，我建議你唔好睇呢段片住，我驚會破壞曬你之後睇呢套戲係嘅體驗啊。
Ok，我哋今集講嘅內容會集中喺第一集嘅電影世界入面，小說入面嘅內容我哋係唔會深究。
好啦，一開始就出現咗呢位邪惡嘅校長鄧不利多， 講述佢點樣喺麻瓜世界裏面喺度偷偷麻瓜嘅電力。（畫面展示鄧不利多用裝置「吸」走街燈的光，而且被吸走光的街燈有後製-150W，而鄧不利多的裝置則後製有+150w）
你可能會話，佢想低調行動，唔想騷擾到啲麻瓜瞓覺啦。但係佢又會派海格揸住架電單車，開行個引擎嘈到拆天咁款飛過嚟。盞大光燈仲要閃到好似月亮咁燦眼（上網搵燦眼嘅正寫係掁眼），如果有個麻瓜打開窗簾望下發生咩事，分分鐘報警都似，真係唔知佢哋係咪想低調行動。
嘈夠未啫，而家幾點呀，唔使瞓啊！（畫面顯示周星馳《功夫》包租婆的畫面）
死肥婆早抖啊。（聲音是《功夫》中田雞的聲音，畫面是鄧不利多用裝置把光射出去）
然後我哋就嚟到霍格華茲第一大謊言：
He is going to the finest school of witchcraft and wizardry in the world.（他要去的是世界上最好的魔法學校。）
（片段是海格對向哈利的阿姨說明）
唔，世界上最好嘅魔法學校。乜我冇同你講咩，成個世紀最邪惡嘅巫師佛地魔都係出自於呢個學校㗎。另外佔成間學校四分人嘅史萊哲林學生，個個畢咗業唔係變壞人就係加入黑社會，個個殺人放火當食生菜。呢間咁優秀嘅學校培育咗咁多優秀嘅人才世界仲點會混亂啊。（畫面展示六年後的魔法混戰）
然後嚟到呢間學校第二大謊言：
Gringotts, the wizard bank. Ain’t no safer place, not one. Except perhaps Hogwarts.
（古靈閣，巫師銀行。除了霍格華茲，那裏是最安全的地方了。）
（片段是海格向哈利說明。）
除咗霍格華茲之外，呢度就係世界上最安全嘅地方？
即係你同我講霍格華茲係世界上最安全嘅地方呀。
（切一個海格的畫面）係呀，乜我冇同你講咩，我養咗隻有三個頭嘅狗，放咗喺間房入面。啲學生唔小心入到去出返嚟，隨時冇咗啲手手腳腳。
另外，我以前仲養咗隻巨型蜘蛛，佢而家入咗黑森林生咗成竇好似人咁大嘅仔。
我哋仲有條巨大嘅蛇妖潛伏喺地下水道，隨時上嚟石化曬全校嘅人。到時啲展品多到開翻間蠟像館都仲得。
學校後花園仲種咗棵殺人魔法樹，會無差別攻擊所有學生。搞到每次路過嘅學生都要簽定生死狀，每次經過都要買定保險咁滯。
學校耐唔耐仲會舉行埋啲殺人魁地奇比賽，隨時打到你入廠都似。
仲有呀，遲啲你三年級嗰陣，我哋仲會請埋催狂魔嚟吸走曬你啲靈魂添呀～
總括嚟講，霍格華茲係一個好安全嘅地方呀～（切一個海格的畫面）
睇嚟海格真係收咗鄧不利多唔少嘅錢。年中真係有唔知幾多細蚊仔同家長畀佢行騙。
然後，有一幕我想畀大家睇下。（畫面是全部一年級生走進可以容納全納人那個大堂（飯堂？））
你睇下妙麗格離呢位同學仔。
原本佢第一次入嚟見到呢個畫面都好興奮㗎。（加入頭頂滿是緞帶的畫面）但妙麗把死人口係咁講嘢，係完全打亂曬佢嘅雅興，一路聽佢講嘢，聽到個笑容都開始慢慢收拾。
佢個樣好似係喺度同我哋講緊 ：係喇係喇，你好巴閉啦死八婆，講夠未呀。
然後呢個女仔從此冇喺妙麗身邊出現過。
然後嚟到呢間學校第一項痴線嘅措施。
唔知點解講到三樓好似好危險 ，禁止所有學生進入。
但條魔法樓梯就會無端白事送啲學生上三樓。
度門仲要鎖都冇鎖，一開就入到去。
甚至無任何警告標示貼喺門口，阻止學生進入。
你究竟係想保護啲學生嘅生命安全啊？定一話想引啲學生入去畀三頭狗咬死呃保險金架？
然後我想講下飛鼠呢個角色。
作為全校唯一個工友，係要一個人徒手清潔曬成座城堡咁大嘅學校，啲學生瀨屎瀨尿全部都好似要佢一次過問嚟抆曬咁樣。分分鐘連魁地奇嗰啲草地都要佢剪埋。
鄧不利多真係識善用學校資源呀～連多個校工都唔肯請。話唔定飛鼠仲係袋緊最低工資。真係好過份。
另外仲要佢做埋保安嗰份工作。
好似要無時無刻都要巡曬成間學校咁樣。（有好幾個不同的畫面都是飛鼠飛奔去報告的情況）守住三樓走廊嘅同時間，又要守住禁書區門口。
最好笑係，成間學校咁大，只要哈利波特想入侵禁制區嘅時候，佢就會喺附近出現㗎啦。
話唔定飛鼠係一個大規模嘅校工團隊嚟㗎。（畫面上原本只有一個飛鼠，一個聲效過後，畫面上被多貼上三個飛鼠）
佢哋全部都係孖生兄弟帶住同一隻貓守喺霍格華茲每個角落。所以間學校咁大都可以畀佢哋清潔到就係咁解啊。我怪錯咗你喇，鄧不利多。原來你係有咁嘅安排㗎。
跟住就嚟到呢間學校第二個痴線嘅政策，就係分派學院喇。
我知道同樣質素嘅學生放埋喺同一堆，係比較容易管理嘅 。
但係你都唔使標籤所有壞嘅學生去史萊哲林㗎嘛。
你唔係應該要平均分配啲學生一齊相處先至正確嘅咩？咁啲乖仔乖女咪可以感化一班壞咗嘅同學囉。遲啲馬份隨時係可以連操行獎都攞埋啊。（畫面展示電影外妙麗和馬份（飾演者，小朋友）玩耍的畫面，畫面在妙麗身上加上好學生標籤，馬份加上壞學生標籤，一個聲效後馬份身上的壞學生標籤改為好學生。）
但係呢間學校就係將所有壞嘅學生放埋喺同一堆，搞到愈壞嘅學生只會變得越嚟越壞。你估個個都好似石內卜咁偉大咩。
然後麥教授去到第7集仲要特登趕曬所有史萊哲林嘅學生落地牢困住佢哋，唔畀佢哋搞事。可見連麥教授都對呢班學生有相當程度嘅歧視。
我係老細嘅話，我都唔會請史萊哲林嘅學生。遲啲櫃桶底一定畀佢哋穿曬咁滯。
（扮演老闆）而家有一分鐘畀你介紹自己。
（扮演應徵者1）你好我係跩哥．馬份，係霍格華茲 史萊哲林嘅畢業生。
（扮演老闆）ok，唔使啦，你返去等通知啦。
咳咳。
（扮演應徵者2）你好，我係納威隆．巴頓係霍格華茲葛來分多嘅學生。
（扮演老闆）ok，唔使啦，你聽日幾時可以返工呀？
所以史萊哲林嘅學生生大個咗個個因為失業先加入黑社會渣，除非佛地魔開公司就話會請佢哋啫。
好啦，呢樣嘢都算喇。
呢頂分類帽仲要大大聲講晒人哋啲性格特質畀全校嘅人聽。
連心中嘅諗法都爆埋出嚟。
Not Siytherin, eeh? （唔要史萊哲林？吓？）
喂，大佬，你唔好再講得大聲啲。而家係人都知我歧視史萊哲林喇。
讀呢間學校一開始就冇曬啲個人私隱，真係痴線。
然後，呢度我要揭發鄧不利多虛偽嘅盧山真面目。
你仲記得之前呢一幕嗎？呢條靚妹得出（分類帽的）結果之後，鄧不利多都hea到求其拍幾下手背就當慶祝咗。
就連分配妙麗嘅時候都係咁嘅死樣（目無表情拍手背）。
但當哈利波特分配到去葛來分多嘅時候佢就——wow好開心呀（拍手）。你睇佢個樣興奮到。最後仲要對住哈利波特一人舉杯慶祝。
睇到妙麗個樣當堂死曬，個心一定諗緊：點解鄧不利多你淨係同哈利一個人慶祝嘅，仲要拍手拍到咁興奮公平咩？
鄧不利多真係偏心到出曬面。
跟住就嚟到呢個學校第三項黐線嘅政策。就係呢條驚嚇魔法樓梯喇。
嘩，話咩事呀？可以無嚟啦間喺同學仔行上去嘅時候自己旋轉。心血少啲嘢form1仔真係隨時嚇破膽。
然後你睇唔睇到個樓底有幾高呀？啲學生一叉錯腳隨時跌落去萬丈深淵變成肉醬意粉。
And Gryffindors note that five points will be taken from your house for your classmate's cheek.
（另外葛來分多嘅學生，由於你哋嘅同學得罪咗我，你哋會被扣五分。）（畫面是石內卜上課情況，中英文字幕是刻意不同）
石內卜你無論減葛來分多幾多分，鄧不利多都總係有方法同你填平條數架。
我都唔知你喺度笑緊乜。（配合這句的畫面是馬份開心笑）
之後鄧不利多幫加成60分啊。（配合這句的畫面是哈利波特開心笑）
然後我哋就可以睇下霍格華茲嘅老師係幾咁優秀。
當呢位威隆巴頓先生失控飛上天嘅時候，胡奇夫人嘅反應係得三種，就係：隆巴頓先生。隆巴頓先生。同埋隆巴頓先生。
胡奇夫人身為飛天掃把老師，居然係唔識咒語令學生安全降落返地下。佢唯一做嘅嘢，就係差條腰大聲呼喝一個失控緊嘅學生靠自己落返嚟地面。個樣仲要好嬲，好似覺得係人哋唔啱咁樣。
然後佢終於攞支魔杖出嚟諗住制止佢啦。點知下一刻係選擇淆底逃避，撲到好似守門員咁款。
後面有一大班學生喺度佢係完全唔理，由得佢哋死。
然後可能塊草地太硬，撼親個頭，搞到佢好遲先起返身去救人。
溫咖癲啦唯啊薩 都唔用就咁畀納威跌落地下。佢咁唔死得真係靠佢命大。
根本呢一切係完全可以避免，但呢位霍格華茲嘅優秀導師係冇採取任何嘅行動就咁望住佢跌落地。事後仲要留低班form1仔喺原地，連工友飛鼠都唔叫過嚟看住佢哋，就咁走人。
究竟佢有冇諗過呢班學生係會再次唔小心飛咗上天嘅呢？
然後又到咗另一位優秀嘅教授發揮佢嘅行政特權。（畫面上是麥教授）
佢係可以佔用哈利波特上堂上胡其夫人堂嘅時間，帶佢去另一笪地方搵另一個學生。然後佢係連門都唔敲，就咁衝入去人哋間課室，阻礙全班人上堂，仲要強行帶走班上其中一位學生。
Professor Quirrell, excuse me. Could I borrow Wood for a moment, please? （奎若教授，唔好意思，我可以借木透出嚟？）
梗係Sure啦。你係鄧不利多身邊嘅大紅人，我唔畀你帶走佢，分分鐘連職都冇得升呀。
然後你去睇下佢（麥教授）個樣開心到。
搞咁多嘢，原來只係為咗幫佢個學院葛來分多搵個守捕手咁大把。就可以阻住其他老師上堂喇，真係自私濫權無極限。
跟住我哋落嚟又可以睇下，呢間學校嘅老師係有幾咁優秀。我哋有請奎若教授。（奎若教授驚慌失措地跑進坐滿學生的大堂，並且一邊跑一邊尖叫。）
作為成間學校極其重要嘅黑魔法防禦術老師，居然係吹到連一隻普通嘅魔物（山怪）都應付唔嚟，仲要第一時間喺全校學生面前瘋狂尖叫，製造恐慌。
鄧不利多見到呢個咁冇用嘅導師，居然係冇炒佢魷魚都不特止，仲要連一啲疑心都唔起。到時啲學生畢業，真係分分鐘連一隻康瓦耳郡緣仙都搞唔掂。
如果我係學生，見到咁垃圾嘅防禦術老師，我早過咗檔去德姆蘭學院啦。你睇幾有型。（畫面上有德姆蘭學院學生向火把吹氣，讓火變成一條小火龍）
唔抽得至少都可以冧死囡啊。（說這句時配的片段是這個）
跟住又嚟到呢間學校第四個痴線措施。
隻山怪出咗嚟四圍遊走，居然係冇任何廣播系統通知全校嘅人去避難。好似妙麗呢啲喊足成日嘅玻璃心隨時畀你害死。
但係一啲唔關學生嘅事呢，佢就會開咪講曬畀全世界人聽。
All teachers to the second-floor corridor immediately.（所有老師立即到二樓走廊。）
然後麥教授見到呢三條form1仔解決咗一隻連老師都要淆底嘅怪獸，保障咗成間學校嘅安危，居然先係加得佢哋五分咁大把。
反而上堂答埋啲垃圾問題成十分咁多。
Excellent ten points to Gryffindors.（畫面上是妙麗在草藥學課堂上回答問題。）
然後遲咗上床訓教就要扣人哋成150分咁多。
真係唔知呢間學校嘅評分準則係點樣。
諗諗下，其實隔離唔係有石內卜企喺度，麥教授隨時加佢哋兩百分都似。（這裏應該是說老師們趕到，看到山怪已被打敗的一幕。）
不過冇所謂啦，下一刻佢（麥教授）就私人醒咗哈利波特一把光輪2000喇。真係偏心到痴孖筋。
你睇下隔離木透個樣，係睇到佢難以置信，個心一定喺度諗緊：食屎契弟，作為魁地奇隊長嘅我，幫麥教授打咗咁多場比賽，比人撼咗唔知幾多次頭，連一支地拖都冇收過。你條契弟，居然連一場比賽都未打就有禮收，公平咩？
跟住又嚟到學校第五樣痴線嘅措施。
霍格華茲明明係一間教育機構嚟㗎嘛，除咗培育社會棟樑（畫面上展示的是佛地魔）之外，就係保護學生嘅人生安全㗎喇。但係唔知鄧不利多搵間學校嚟較飛，決定要收埋呢粒極其重要嘅魔法石喺學校深處。
我仲喺度諗緊，明明呢個職責應該係魔法部負責返先至啱㗎嘛。
萬一世外有佛地魔以外嘅邪惡組想要撻走呢粒魔法石，出起事上嚟真係唔知會死幾多學生。
啲邪惡勢力分分鐘仲會捉走幾件做人質，威脅鄧不利多交出魔法石。
真係唔知呢個校長點做到校長？
然後又嚟到唔知第幾項痴線嘅措施喇。
學生因為遲咗瞓覺每人要扣50分都算喇。依家仲要唔畀人唔瞓覺，俾人帶佢哋入去黑森林執行自殺任務，目標就係要搵出畀邪惡生物追殺緊嘅獨角獸。啲form1仔行行下真係隨時遇到阿辣哥啲子孫都似。
但相比之下都冇乜所謂喇。佢哋遇到嘅就係佛地魔本人喇。（馬份尖叫跑走）其實馬份你唔洗走㗎喎，你係史萊哲林嘅學生嚟㗎嘛，佛地魔趕住嚟招攬你都嚟唔切啦。
好啦，我哋係時候睇下呢間學校培訓嘅出嚟嘅學生，係有幾咁優秀。
You’re sneaking out again, aren’t you? No, I won’t let you. You’ll get Gryffindor into trouble again. I…… I…… I…… will ……（你班友又上偷走？我唔畀！你哋又會連累葛來分多㗎喇。我…我…我…會……）
FIGHT YOU!（打你哋!）（畫面顯示納威阻止主角，並擺出雙手握拳的戰鬥架式）
你哋睇得一啲都冇錯，呢位就讀魔法學校嘅魔法學生喺面對挑戰嘅時候，居然係採取麻瓜手段用拳頭解決問題。
第時畢咗業分分鐘分分鐘都會用成頭面對魔杖大戰。
（畫面切到最後一集納威站出來面對佛地魔的一幕）
佛地魔你食屎啦。打打打……（畫面疊合威隆和《JOJO》中不斷出拳）
阿哇呾喀呾啦（畫面是佛地魔使用索命咒）
如果後期唔係有哈利幫佢補習，頭先呢一幕真係好大機喺第7集出現㗎。
然後我哋係時候講下，呢個學校守護魔法石嘅防衛措施係有幾咁優越。
基本上除咗第一關三頭犬之外，其餘嘅防禦都係形同虛設。
就由魔鬼網呢關講起先啦。魔鬼網最怕係邊咩呀？就係陽光啊。而呢個知識係點得返嚟？就係一年級生都會讀嘅草藥學課堂啦。然後點樣製造到啲陽光出嚟呀？就係用路摸思呀。
你睇下，過呢關需要擁有嘅知識，全部都可以喺一年級嘅課程搵到曬。基本上只要你上堂唔瞌眼瞓嘅話，就過到㗎喇。
接下來，嚟到最容易嘅一關。居然係連飛天掃把都提供埋畀你，真係好人。仲要有個超明顯、超大嚿嘅鎖匙飛喺你面前，叫你嚟捉佢。
然後其他鎖匙喺度做緊啲乜嘢呀？就係全程幫哈利波特提供𢯎痕服務，搞到好似烏蠅嬲蜜糖咁樣。你睇下，哈利真係好似痕到好似𢯎痕咁樣。（有一個捉鎖匙時，哈利好像在抓癢的畫面）
如果呢一幕出現喺遊戲入面，哈利嗰條HP bar應該會咁樣郁（畫面跳出-1-1-1，但HP bar一動也不動）。我真係唔知點呢一關可以難到邊個？
好啦，捉棋呢關我都費事講啦。一個form1仔嘅棋藝係可以超越魔法人工智能 MI——Magical Intelligence。成件事搞到好似一個細路仔可以成功挑Alphago咁款 。
世界係無可能發生呢啲嘢。
我諗麥教授一定係唔小心set咗easy mood 頂啦。
然後嚟到哈利波特大戰奎若教授混合佛地魔嘅橋段。頭先我咪話過，呢間學校嘅畢業生大個咗，係隨時會用拳頭打人架嘛。依家我哋就可以證實呢個理論啦～（畫面展示遊戲般的QTE系統，選擇分別是三角形用魔法殺人和正方形用徒手）
（之後正方形徒手殺人暗了一下，顯示選擇了徒手殺人）
真係唔知咩事？
唔通JK羅琳喺第一集仲未發明索命咒？又唔係呀，佛地魔一開始就射出咗啲綠色光出嚟，隊冧哈利阿媽㗎嘛。
好啦，我就當佢唔識啦。但頭先佢撻一下手指，就可以產生熊熊烈火圍住成間地下室。係咁點解，佢唔撻多幾下手指直接燒死哈利波特呢？唔通用麻瓜手段殺人係可以侮辱對手。
哈哈，我而家徒手摙死你呀。你係咪覺得好羞恥呀？喊呀，求我啦！
真係完全唔知唔明唔理解。
然後佢畀哈利揸爛咗隻手，係要堅持唔用魔法咁戇居居行埋去，畀人揸爛埋塊面。真係完全唔知唔明唔理解。
其實我想講，真係唔知搞咁多防禦措施做乜鬼，根本鄧不利多隨身攜帶粒魔法石，就已經係最好嘅解決方案啦。咁成件事就完咗喇。（展示電影製作名單）
然後我哋嚟到成間學校最痴線嘅地方。就係頒發學園杯嘅時候喇。一開始成座禮堂嘅天花全部都掛上史萊哲林嘅旗幟。好似講明一定係佢哋拎冠軍咁樣。之後仲要逐一公佈四間學院分數嘅結果，氹到史萊哲林班友同石內卜幾開心呀。Wow～（史萊哲林的同學和石內卜掌手）
咦，吔屎啦你。（展示馬份得戚的表情和榮恩失望的表情）
呢班小朋友實在係太天真。鄧不利多而家就展開佢嘅終極邪惡陰謀論喇。（畫面切到鄧不利多上）
哈哈哈，其實我講笑咋，依家我哋仲有好多分數要加畀葛來分多啊。
吓？你玩我啊？（畫面切到石內卜上）
頭一個分數，我要加畀妙麗格蘭傑小姐，因為佢上草藥學課堂嘅時候係冇合到眼瞓，50分。
吓？點解要拖到而家先嚟加分嘅，校長？（畫面展示一個史萊哲林同學帶着失望的表情）
第二個分數，我加交畀榮恩衛斯理先生，因為佢成功咁擊敗eady mood 嘅巫師棋MI電腦，50分。
Yeah ~（榮恩高興拍手）
夠啦，唔好再加喇，校長。（馬份失望的表情）
第三個分數，我要加畀哈利波特先生，因為佢夜媽媽唔上床瞓覺多管閑事，60分。
Wow~（葛來分多的同學高興拍手）
其實我之前扣咗你哋50分，就係為咗而家呢一刻啊。（切到麥教授微笑的畫面）
嘩，我真係多謝曬你呀，哈哈。（切到哈利開心笑的畫面）
最後嘅分數，我要加畀奈威隆巴頓先生，因為佢充份表現到作為魔法學生應有嘅戰鬥姿態，10分。（威隆疊合《JOJO》出拳的畫面）
喂呀，校長。你想我哋贏都唔使咁出面㗎。（其他人高興，威隆呆滯）
呢間咩學校嚟架？（史萊哲林學生失望）
好啦，所以個獎呢其實係屬於葛來分多架。
（扮演哈利內心）我就知你籠嘢啦，校長。但係你做數都唔使做到我哋咁假㗎。
（扮演鄧不利多內心）冇計啦，鬼叫我同你熟咩，遲啲我仲要用你嚟打敗彿地魔架嘛。梗係畀啲甜頭你先啦。
聽到未呢？呢啲簡直係侮辱，簡直係詆毀史萊哲林啊。鄧不利多應該一早就掛上葛來分多嘅旗幟先至啱㗎嘛。
依家個情況真係仲衰過奧斯卡頒錯獎。校長係特登頒一個錯嘅獎畀你，然之後就……哎呀sorry ，其實我玩你㗎，個獎唔係你㗎，你都係畀番人哋啦。
真係荒謬唔荒謬。
然後你再細心睇下，當每次校長加分畀葛來分多嘅時候，雷文克勞同埋拍赫夫帕夫嘅同學仔都會同佢哋拍掌歡呼，最尾仲要因為史來哲林輸咗，而一齊掉帽慶祝，後面班同學仔開心到連自己都有份贏咁。睇嚟呢三個學院都對史萊哲林存有偏見，唔想佢贏，搞到史萊哲林班友全部都要喺度低頭低頭思故鄉。
個個返去有童年陰影都似喇。
（扮演史萊哲林學生）我個心碎到一地都係呀。
唔怪得有咁多次邪惡嘅巫師都係出史萊哲林啦。就係因為佢哋以前喺霍格華茲比人糟質過先報復社會呀。
總括嚟講：霍格華茲係垃圾。鄧不利多係邪惡軸心。麥教授偏心無極限。石內卜係全校唯一好老師。
年終都唔知死幾多學生畀鄧不利多隱瞞咗，第時我一定唔會畀我啲仔女入讀呢間垃圾學校架啦。我玩完啦。哈哈。
遲啲話唔定仲會玩埋第二第三集㗎，如果你仲發現左呢間學校有咩邪惡嘅陰謀，一定要喺下面留言公諸於世，再登報紙上預言家日報等魔法部可以殺咗呢間學校佢。ok，我哋今集係咁多。我哋遲啲再見，bye。
沒有留言:
發佈留言