工•情

工•情

【第一幕】

場境：酒樓

我：經理！

經理：（抬頭瞥了瞥，朝我點點頭）係，等等。

經理：（對客人）你地慢慢食。我去招呼其他人先，有咩事再叫我啊！

經理：（走向「我」）先生，有咩幫到你。

我：你地係咪請人啊。


經理：係啊。你幾多歲啊？

我：十八歲，我上個月啱啱考完公開試。

經理：咁即係你之前都係讀緊書啦？

我：係。

經理：（微怒）你有無睇清楚出面個招聘告示架。要兩年相關經驗啊？

我：（慢慢低下頭）

經理：（算是好聲好氣）兩年經驗啊。無就過主啦。唔好阻住我地做生意。

我：（緩緩抬起頭）經驗，我有。

經理：（一面疑惑）

我：我有十八年被服務嘅經驗。

經理：（驚訝的頓一下）er……我地講嘅經驗係從事的經驗，而唔係被服務……

我：你地係想唔重新訓練一個新人待人接物阿麻。（語速微急）我無問題架。我會諗返起阿媽點對我、點服侍我，去對返啲客架。我無問題架。

經理：唉。年輕人，你知道父母點對你好，就好啦。見你都算身光頸靚，應該唔係無咩錢果啲。如果你係想穩份工，穩啲錢，去報答父母。我建議你係呢幾個月裏面穩啲有意義嘅野黎做，唔好成日掛住食玩訓，打工都就盡量唔好啦。得閒同父母黎喝下茶，叔叔俾個八折你又點話。

經理：（拍拍「我」肩膀）明就快啲返屋企，計劃下，唔好虛度光陰。

我：（緩緩的，帶點疑惑的點點頭，似懂非懂的轉身離去）

經理：（待「我」離去）得閒黎飲茶啊！

【第一幕完】

【第二幕】

場境：家

我：（打開家門）

母：（停下打掃，望向「我」）（語速稍快）吓，番黎啦！晨咁早就出咗去。去玩呀啊？

我：我……

母：（語速稍快）淨係識得玩。一係就係屋企到打電腦，一係就出去。

我：我……

母：（語速稍快）去玩又唔講低係唔係度食。呢個時間先番！成二點啦，（語速回復正常）點啊食咗嘢未啊？

我：（搖搖頭）

母：唉，都估到架啦。（走向放食物的櫃）食咩啊你，粉定麵啊？

我：阿媽啊。

母：（沒有回頭，繼續走）吓？

我：不如去飲茶囉！

母：（馬上停下來，望向我）吓，而家？咁鬼貴，係屋企食咪算囉。

我：（失望的微微低頭）哦……

母：（轉身）要去就星期日去，等埋你阿爸休息先去。

我：（猛然抬起頭）係！

母：（偷瞟了我一眼）你咁早起到身先好。

我：（跑進廚房。拿個煲子，放水進去。把煲置在爐上，點火。）

母：你做咩啊？你又知要放幾多水。仲有粉定麵啊？

我：兩碗份嘅水阿麻。我估到你未食架啦，你食咩我咪食咩囉。

母：唉吔，你出來。咪搞到廚房立立亂。粉啱唔啱啊？

【第二幕完】

【全劇終】

後記

不知為何不是小說而是劇本。

僅以此劇感謝父母，尤其多謝部長級媽媽。

關於部長級媽媽：話說我前幾天才知道，媽媽原來放棄了做酒樓部長，轉做全職家庭主婦。